குர் ஆன் வழியில் …

அல்லாஹ்வின் மன்னிப்பும், கண்ணியமான கூலியும் யாருக்கு?

அல்லாஹ்வின் மன்னிப்பு, அவன் நாடியவர்களுக்கு, அவனிடம் உளம் நெகிழ்ந்து, உரியவாறு மன்னிப்புக் கோருவோருக்குக் கிடைக்கும் என்பது நாமறிந்ததே! மேலும், அவனது நற்கூலி, நற்செயல் செய்தவர்களுக்குக் கிடைக்கும் என்பதும் பொதுவாக நாம் அறிந்து வைத்திருப்பதே! ஆயினும், இது பற்றி வல்ல அல்லாஹ் சுபுஹானஹுவத ஆலாவின் அறிவிப்பொன்று நமது கவன ஈர்ப்பைப் பெற்றுள்ளது. ஆம் அது பெரும்பாலான முஸ்லிம்களால் அடிக்கடி ஓதப்படும் யாஸீன் சூறாவின் 11ஆம் வசனமே. ‘நீர் அச்சமூட்டி எச்சரிக்கை விடுப்பதெல்லாம், எவர்கள் இந்நல்லுபதேசத்தைப் பின்பற்றி, மறைவாகவும் அர்ரஹ்மானை அஞ்சுகிறார்களோ, அவர்களுக்குத்தான்.எனவே, அத்தகையோருக்கு மன்னிப்பைக் கொண்டும், கண்ணியமான கூலியைக் கொண்டும் நீர் நற் செய்தி கூறுவீராக’ – Continue reading →

குர் ஆன் வழியில் …

மார்க்கத்தில் நிர்ப்பந்தமில்லை.

இன்னும் உம்முடைய ரப்பு நாடியிருந்தால், பூமியிலுள்ள அனைவருமே ஈமான் கொண்டிருப்பார்கள். எனவே, மனிதர்களை அவர்கள் முஸ்லிம்களாகிட வேண்டும் என்று நீர் கட்டாயப்படுத்த முடியுமா? இது அல் குர்ஆன் 10:99 இல் அல்லாஹ் எழுப்பிய கேள்வி. அவன் தனது வேதத்தைப் பரப்புவதற்குக்கூட நிர்ப்பந்தத்தை விரும்பவில்லை. பலவந்தத்தால் சாதிக்கும் காரியங்கள் நிலைப்பதில்லை. விசேடமாக ஈமான் என்ற நம்பிக்கையைப் பலவந்தத்தின் மூலம் அளிப்பதனால் எதிர்பார்த்த இலக்கை எட்டுவதைக் காண முடியாது. பலவந்தத்தின், அல்லது அல்லாஹ்வின் திறமையால் ஏற்பட்ட பலனாகவே இருக்கும். அதனால் உண்மை நிலை வெளிப்படப் போவதில்லை. ஆக அவன் அறிவு பூர்வமாக ஈமான் ஏற்படுவதையே விரும்பி இருக்கிறான். அத்தோடு, மற்றைய படைப்புக்களைப் போலல்லாது மனிதனுக்கு அவன் பிரித்தறியும் அறிவான ஆறாவதறிவைக் கொடுத்து, பூரண சுதந்திரத்தையும் அளித்துள்ளான். நன்மை எது? தீமை எது? என்பதைக் கண்டறியும் உரிமை அவர்களிடமே விடப்பட்டுள்ளதால், மறுமையில் அவரவர் செய்தவற்றுக்குரிய கூலி கொடுப்பதில் தயவு தாட்சன்யம் இருக்காததுடன், அதனை யாரும் எதிர்பார்க்கவும் இயலாது. தாமே தம் நிலையை நன்கு அறிந்து கொள்வர். Continue reading →

குர் ஆன் வழியில் …

அல்லாஹ் நமது தீமைகளை அகற்றுவானா?

இந்த வினாவுக்கு நேரடியான பதிலைத் தரும் புனித குர்ஆன் வசனமொன்றை உங்கள் முன் சமர்ப்பித்து கட்டுரையைத் தொடர்வோம். அல் குர்ஆன் சூரா முஹம்மது 47 வசனம் 2. ‘ இன்னும் ஈமான்கொண்டு, நற்செயல்களையும் ஆற்றி, முஹம்மது (ஸல்) மீது இறக்கி வைக்கப்பட்டதை, அது தங்கள் ரப்பிடமிருந்துள்ள உண்மையாய் இருக்கும் நிலையில் ஈமான் கொண்டார்களே அவர்களின் தீமைகளை, அவர்களைவிட்டும் போக்கி, அவர்களுடைய நிலையையும் அவன் சீராக்கிவிட்டான்.’ Continue reading →

‘ஒழுக்கம் விழுப்பம் தருதலால் ஒழுக்கம் உயிரினும் ஓம்பப்படும்’ இது வள்ளுவர் கூறும் அறநெறி. ‘எந்தத் தந்தையும் தனது குழந்தைக்கு நல்லொழுக்கத்தைத் தவிர மிகச்சிறந்த ஒன்றைக் கொடுத்துவிட முடியாது’. இது மேலைத்தேய அறிஞரான வைற் ஹெட் என்பாரின் கூற்று. இதுபோன்ற பல்வேறு கருத்துக்கள் ஒழுக்கத்தின் விழுப்பத்தை, அதன் இன்றியமையாமையை, அதன் நன்மைகளை எடுத்தியம்புகின்றன.

‘மேலும், (நபியே) நிச்சயமாக நீர் மிக உயர்ந்த மகத்தான நற்குணம் உடையவராக இருக்கின்றீர்’-68:4. இது புனித குர்ஆனில், இறைவன் தனது திருத்தூதர் முகம்மது நபி (ஸல்) அவர்கள் பற்றி வழங்கிய நற்சாட்சிப்பத்திரம். உலகையே உய்விப்பதற்காகத் தன்னால் தேர்ந்தெடுக்கப்பட்ட அம்மனிதரில் எத்தனையோ சிறப்பம்சங்கள் நிறைந்திருந்தன. அவைகளில் எதனையும் பற்றிக் கூறாது உயர் குணத்தைப் பற்றி மட்டும் சொல்வதிலிருந்து ஒழுக்கத்தின் பெருமையும், அதன் இன்றியமையாமையும், அதன் உயர்வும், அதன் நன்மைகளும் தெரிய வருகிறது. அந்த வகைச் சிறப்பம்சங்கள் பொருந்திய உயர் குணமாய், அல்லாஹ்வே பெருமைப்படுத்தும் ஒழுக்கம் பற்றிக் குர்ஆன் கூறுவதைக் காண்பதே இக்கட்டுரையின் நோக்கம். Continue reading →

ஈமான் கொண்டு நற்செயல் செய்தல் என்ற இத்தொடரும், அதன் நன்மைகளும் பற்றிப் புனித குர்ஆன் பல்வேறு சந்தர்ப்பங்களில் கூறிச் சென்றுள்ளது. அல்லாஹ் இந்தளவு முக்கியத்துவத்தை, ஏன் இவ்விரு செயற்பாடுகளுக்கும் கொடுத்துள்ளான் என்பதை ஆழ்ந்து சிந்தித்தால், மனித வர்க்கத்துக்கு வல்ல அல்லாஹ் வழங்கியுள்ள அளவற்ற அருட்கொடைகளும், அதன் பயன்பாடுகளும், அதனால் பெறப்படவுள்ள நன்மை தீமைகளும் அறிவுகளும், ஒழுக்கங்களும், இன்ன பிறவும் தெரிய வரும். இத்தகு நன்மைகளை எழுத முயல்வது, இமயத்தை ஊசித் துளையுள் நுழைத்துவிடும் செயலே! ஆனால், அதனை அறியும் முயற்சியில் ஈடுபடின் வல்ல அல்லாஹ் அதனை இலகுவாக்கி நமது முயற்சிகளுக்கு உந்துதலைத் தருவான் என்பது அசைக்க முடியா உண்மையும் கூட. காரணம், அல்லாஹ் நம்மால் செய்ய முடியாததைச் செய்யும்படி நிர்ப்பந்தித்துச் செல்பவனல்ல. இமயத்தை ஊசித்துளையுள் நுழைத்துவிடும் செயல் என நான் கூறியது, நற்செயலின் செறிவும் பருமனும் எந்தளவுள்ளது என்பதைக் கோடிட்டுக் காட்டவே. முயன்றால் முடியாதது எதுவுமில்லை என்பது வழக்கிலுள்ள பழமொழி. முயற்சியாளர் அடைந்த வெற்றிகளும் நாமறிந்தவையே. வல்ல அல்லாஹ்வும் அது பற்றி, நீங்கள் முயன்றதைத் தவிர வேறில்லை எனவும் உங்கள் முயற்சிகள் எண்ணப்படும் அதற்கான கூலியும் உண்டு என்றெல்லாம் கூறியிருப்பது நாம் அறிந்து கொள்ளப் போதுமானதாகும். Continue reading →

குர்ஆன் வழியில் …

அல்லாஹ்வால் கேடு என எச்சரிக்கப்பட்டோர்…

குர் ஆனில் சில இடங்களில் சில தடுக்கப்பட்ட விடயங்களைச் செய்வதனாலோ, அன்றி ஏவப்பட்டவற்றை செய்யாமல் விடுவதனாலோ நம்மில் கேடடைவோர் பற்றி வல்ல நாயன் அல்லாஹ் சுபுஹானஹுவதஆலா கூறியுள்ளான்.அவ்வாறு எச்சரிக்கப்பட்டு,சாபத்துக்கு உள்ளானவர்களாகக் கூறப்பட்டவர்களில் அல்லாஹ்வை நினைவு கூர்வதைவிட்டும் இறுக்கம் அடைந்தவர்கள் பற்றி ஆய்வதே இப்பக்கத்தின் நோக்கம். அல் குர்ஆன் 39:22 ‘அல்லாஹ்வை நினைவுகூர்வதை விட்டும் அவர்களுடைய இதயம் இறுக்கமானவர்கக்குக் கேடுதான். அவர்கள் பகிரங்கமான வழிகேட்டில் இருக்கின்றனர்’.

சில விஷமிகள் தங்களுக்கு விளங்காத நிலையில் அறிவதற்கும் மனமின்றி தமது மனோஇச்சைப்படி குர்ஆன் வசனத்துக்கு விளக்கம் கொடுத்துத் தம்மையே ஏமாற்றிக் கொள்கிறார்கள். குர்ஆனிய வசனங்களின் உண்மைகளை, நன்மைகளை அறிவதற்கு எள்ளளவும் எத்தனங்களை மேற்கொள்வதில்லை. மனோ இச்சை வணங்கப்படும் தெய்வங்களில் மிக மோசமானது என்பது இறைகூற்று. மனோஇச்சை ஷிர்க்கை வருவிப்பது.

இந்தளவுக்கு இறைவனின் சாபத்துக்கு உள்ளாவதற்கு காரணம் என்னவென்று காண்போமாயின் பல திடுக்கிடும் உண்மைகள் வெளிவரும். இவ்வுலகில் தோன்றிய அனைத்து நபிமார்களும், இறக்கப்பட்ட வேதங்களும், கட்டளைகளும் அல்லாஹ்வை நினைவு கூரும்படியே கூறிக் கொண்டிருக்கின்றன. அப்படி இருந்தும் அதனைச் செய்யாமல் இருப்பது இறைநிராகரிப்பு என்பதும், அவனது கட்டளைகளை சட்டை செய்யாது விடுவதும், மறுமையில் அவனது  விசாரணைக்கும், அவனது தண்டனைக்கும் பயப்படாத தன்மையைக் கொண்டனவாகவும் உள்ளதே. அந்த வகையில் அல்லாஹ் கூறியமைக்கொப்ப அவனை நினைவுகூராதோர் மறுமையில் குற்றவாளிகளாகக் காணப்பட்டு, நரக நெருப்புக்கு இரையாவதைக் கேடு என வலியுறுத்தவே, அவன் எதிர்வுகூறலாகவும், ஞாபகமூட்டலாகவும் எச்சரிக்கையாகவும், கூறியுள்ளான் என்பது இங்கு தெளிவாகிறது.

அல்லாஹ்வை நினைவுகூருங்கள் எனக் கூறிவிட்டு அவன் வாளாவிராது பல் வேறு உத்திகளையும், நினைவூட்டல்களையும் குர்ஆனில் ஆங்காங்கே பதிவாக்கி உள்ளான். அவைகள் நமது கண்ணில் படாததும், கருத்தைக் கவராததும் துர்அதிர்ஸ்டமே. மேலும், அவனை நினைவு கூர்வதற்கு வழிசமைக்கும் வண்ணம் ஐவேளைத் தொழுகையைக் கடமையாக்கி அதில் அவனை நினைவுகூர்வதன் மூலம் தொழுகையை நிலைநிறுத்தும்படி நமக்கு அறிவூட்டுகின்றான்.

தனது குர்ஆன் 20:14 ஆம் வசனத்தில், மேலும், என்னை நினைவு கூர்ந்திட தொழுகையை நிலைநிறுத்துவீராக’ எனக் கூறியிருப்பதில் தொழுகையின் நோக்கம் மிகத் தெளிவாகக் கூறப்பட்டுள்ளது. இன்னும் தொழுகையின் நன்மை பற்றிக் கூறிய 29:45 வசனத்தில், ‘ … இன்னும் தொழுகையை நிலைநிறுத்துவீராக! நிச்சயமாகத் தொழுகையானது மானக்கேடானவைகளை விட்டும், வெறுக்கப்பட்டதை விட்டும் தடுக்கும். மேலும், அல்லாஹ்வை நினைவுகூர்வது மிகப் பெரியதாகும்’ என அவனை நினைவு கூர்வதே மிகப் பெரியது எனவும் கூறியிருப்பது நாம் கவனத்தில் இருத்த வேண்டியது. அவனைத் தொழுகையில் நினைவு கூரவில்லை என்றால், முக்கிய கடமையாக்கப்பட்ட தொழுகைகூட பயனற்றதாகி விடுவதோடு நஷ்டத்தையும் ஏற்படுத்திவிடும்.

இதனை அல்லாஹ் குர்ஆனில் ‘வேறோரிடத்தில் தொழுகையாளிகளுக்குக் கேடுதான்’ எனக் கூறியே உள்ளான். இவ்வசனம் தொழுவதில் உரிய பயன்பாடான அல்லாஹ்வை நினைவுகூரல் இடம்பெறாத விடத்து ஏற்படும் தீமையைச் சுட்டிக் காட்டவே அல்லாஹ் இவ்வாறு கூறியுள்ளான். மறுமைக்கு முன்னர் தொழுகையை நிலைநிறுத்துங்கள் என்ற எச்சரிக்கையை வெளிப்படுத்தும், அ்றிவுரையும் அல்லாஹ்வினதே!

இன்னும், நாம் அவனை நினைவுகூர்வதை இலகுபடுத்தும் பொருட்டு, குர்ஆனில் பல இடங்களில் நமக்கும் அவனுக்குமிடையில் நடந்தவைகளை ஞாபகத்துக்குக் கொண்டு வந்துள்ளான். அப்படியான வசனங்களில் 7:172 மிகவும் உன்னிப்பாக அறியப்பட வேண்டியது. ‘இன்னும் உம்முடைய ரப்பு, ஆதமின் மக்களாகிய அவர்களது முதுகுகளில் இருந்து, அவர்களுடைய சந்ததிகளை வெளியாக்கி, அவர்களைத் தங்களுக்கே சாட்சியாக்கி வைத்த போது, ‘நான் உங்கள் ரப்பு அல்லவா?’ . ‘ஆம், நாங்கள் சாட்சி கூறுகிறோம்’ என்று அவர்கள் கூறியதை நினைவுகூரட்டும். ஏனென்றால், ‘நிச்சயமாக, தாங்கள் இதனைவிட்டும் மறதியாளர்களாக இருந்துவிட்டோம்’ என்று மறுமை நாளில் நீங்கள் கூறாதிருப்பதற்காக’.

மேற்கண்ட  இந்த வசனம் மறுமையில் அவனை நினைவு கூராததற்கான தண்டனையில் இருந்து மன்னிப்புக் கிடைக்காத சந்தர்ப்பத்தை நன்கு விளக்குகின்றது. அச்சமயத்தில் எந்தச் சாக்குப் போக்குகளுக்கும், சாட்டுகளுக்கும் இடம் தராதவாறு அல்லாஹ் முன்னெச்சரிக்கையாக நடந்து கொண்டுள்ளமை நம் கையறு நிலையைத் தெட்டத் தெளிவாகத் தெரிவிக்கின்றது. அதனாலேயே அவன், தன்னை நினைவு கூராதவர்களை இதயம் இறுக்கமடைந்தவர்களாக விமர்சிப்பதோடு அவர்களுக்குக் கேடுதான் எனவும் சபித்துள்ளான். ஆதலின் நாம் அவைகளை உணர்ந்து மறுமைக்கு ஆயத்தமாவோமா?

– நிஹா -