என்ன பயன்!

வட்டில் இருந்து என்ன பயன்?
வீட்டில் சோறிட ஆளில்லையெனின்!

கட்டில் இருந்து யாது பயன்?
கட்டிய மனைவி வீட்டிலில்லையெனின்!

தொட்டில் இருந்தென்ன பயன்?
தாலாட்டிட குழந்தைப் பேறில்லாதாயின்!

தோட்டிகள் இருந்தென்ன பயன்?
தொட்டிகள் தெருக்களில் அழுகி நாறுமாயின்!

கோர்ட்டுகள் இருந்தென்ன பயன்?
நீதிக்கேற்றுக்கள் இழுத்து மூடப்படுவதாயின்!

நாட்டில் சட்டங்கள் இருந்தென்ன பயன்?
வீட்டிலும் நிம்மதியாய் வாழ்ந்திட இயலாதெனின்!

போட்டி வியாபாரம் நடந்தென்ன பயன்!
தன்பாட்டிலே விலைகள் வானத்தைத் தட்டுமாயின்!

நோட்டில் சைபர்கள் கூடியென்ன பயன்?
நீட்டியே வாங்கும் திறனை இழக்குமாயின்!

நாட்டில் அபிவிருத்தி நடந்தென்ன பயன்?
நாட்டினர் வாழ்வே கேள்வியாயின்!

பாட்டில் அழகு இருந்தென்ன பயன்?
கேட்டிட பயனில் கருத்துக்கள் உற்றதாயின்!

- நிஹா -